தடையை மீறி கிராம சபைக் கூட்டம் நடத்தியதாக, திமுக தலைவர் ஸ்டாலின், சட்டமன்ற உறுப்பினர், மாவட்ட செயலாளர், பஞ்சாயத்துத் தலைவர் உட்பட கூட்டத்தில் கலந்து கொண்டவர்கள் மீது 2 பிரிவுகளின் கீழ் வழக்குப் பதிவு

123

“கொரோனாவை விட திமுகவை பார்த்துதான் முதல்வருக்கு பயம். அதிமுக செயற்குழுவில் வராத கொரோனா, கிராம சபை மூலம் வந்துவிடுமா” – என ஸ்டாலின் கேள்வி

தமிழ்நாட்டில் 12 ஆயிரத்திற்கும் மேற்பட்ட ஊராட்சிகள் இருக்கிறது. இங்கு ஒவ்வோர் ஆண்டும் காந்தி ஜெயந்தி அன்று கிராமசபைக் கூட்டம் நடைபெறுவது வழக்கம். ஆனால், கொரோனா தடுப்பு நடவடிக்கையாக நடப்பாண்டில் இன்று நடைபெறவிருந்த கிராம சபை கூட்டங்கள் ரத்து செய்யப்படுவதாக தமிழக அரசு அறிவித்தது.

கிராம சபை கூட்டத்தில் வேளாண் சட்டங்களுக்கு எதிராக தீர்மானங்கள் நிறைவேற்ற திமுக மற்றும் விவசாய சங்கங்கள் கோரிக்கை விடுத்திருந்த நிலையில், இக்கூட்டங்கள் ரத்து செய்யப்பட்டதற்கு திமுக கடும் கண்டனம் தெரிவித்திருந்தது.

இருப்பினும், திருவள்ளூர் மாவட்டம் கொரட்டூர் ஊராட்சி புதுச்சத்திரம் கிராமத்தில் திமுக தலைவர் ஸ்டாலின் தலைமையில் கிராம சபை கூட்டம் நடைபெற்றது. இதில் கொரட்டூர், அகரவேல், நடுகுத்து வயல் உள்ளிட்ட கிராம மக்கள் கலந்து கொண்டனர். அவர்களின் குறைகளை ஸ்டாலின் கேட்டறிந்தார். இதேபோன்று மாநிலத்தின் பல்வேறு பகுதிகளில் தடையை மீறி திமுகவினர் கிராம சபை கூட்டங்களை நடத்தினர்.

கிராமசபை கூட்டத்தில் பேசிய ஸ்டாலின், கொரோனாவை விட திமுகவை பார்த்துதான் முதல்வருக்கு பயம். அதிமுக செயற்குழுவில் வராத கொரோனா, கிராம சபை மூலம் வந்துவிடுமா என்று கேள்வி எழுப்பினார். மேலும், வேளாண் சட்டங்களால் விவசாயிகளுக்கு என்ன கெடுதல்கள், பிரச்சினைகள், விவசாயிகள் எந்தளவிற்கு பாதிக்கப்படுகிறார்கள் என்பது குறித்தும் ஸ்டாலின் விளக்கினார்.

விவசாய நலனையும், வேளாண் நலனையும் மனதில் கொண்டு இன்றைக்குக் கிராமப்புறங்களின் முதுகெலும்பாக இருக்கும் வேளாண் துறையைக் காப்பாற்ற இந்தக் கூட்டம் நடைபெறுவதாக சுட்டிக் காட்டிய ஸ்டாலின், மத்திய அரசு கொண்டு வந்த 3 வேளாண் சட்டங்களுக்கு எதிராக இந்த கிராமசபைக் கூட்டம் என்ற பெயரில் நடைபெறும் மக்கள் சபைக் கூட்டத்தில் கண்டனத் தீர்மானம் நிறைவேற்றப்படுவதாகவும் தெரிவித்தார்.

இந்த நிலையில், தடையை மீறி கிராம சபைக் கூட்டம் நடத்தியதாக திமுக தலைவர் ஸ்டாலின், சட்டமன்ற உறுப்பினர், மாவட்ட செயலாளர், பச்சாயத்து தலைவர் உள்பட கூட்டத்தில் கலந்து கொண்டவர்கள் மீது 143, 188 ஆகிய பிரிவின் கீழ் வழக்குப்பதிவு செய்யப்பட்டுள்ளது.

LEAVE A REPLY

Please enter your comment!
Please enter your name here